தனிமை

தன்னந்தனியே
உழைத்து பொருளீட்டி
குடும்பத்தை கரை சேர்த்திட முடியுமென
துணிவுகளை
உடுத்தி கரை கடந்து வந்தவளை

தனிமையில்
துணிகளை அவிழ்த்து
ருசிக்கத் துடிக்கும்
முதலாளித்துவம்.
*


உடல்பாதிப்பு
மிகச்சிறியதென்றாலும்
உடனடியாக சரியாகிவிடுவதில்லை
எல்லா வசதிகளோடும் கூடிய
மருத்துவ கவனிப்பிருந்தும்.

ஆறுதலும்
தேற்றுதலும்
நிரம்பிவழியும் உன் விசாரிப்பின்றி.
*


பெரிய வித்தியாசமெதுவுமில்லை
குடும்பதோடு
நல்ல உணவுக்கு
வசதியற்று வாழ்வதற்கும்.

நல்ல வசதிவாய்ப்பிற்காக
தனித்து
குடும்பமற்று கிடப்பதற்கும்.
*