விழா மேடைகளைப் போன்ற திண்ணை
இடித்தகற்றப்பட்டு
சுற்றுச்சுவராலும்
விளையாட்டரங்கையொத்த பின்வாசல்
சுருங்கி
இரும்பு வேலியாலும்
பாதுகாப்பானதாகிவிட்டதென் புதிய வீடு.
எப்போதும்
உறவுளாலும் அக்கம்பக்கத்து தொடர்புகளாலும்
நிரம்பி வழிந்திருந்த சூழல்கள் மாறி
எப்போதாவது
விசேச காலங்களில்
தேர்ந்தெடுக்கப்பட்டவர்கள் வந்திருந்து
திரும்புகின்றனர் இப்போது.!
அவர்களிடமும்
பளிங்குத் தரை பார்தாயா..
உயர் ரக வண்ணப் பூச்சு கண்டாயா..
நவீன சமையலறை.. அதிநவீன கழிப்பறை...
அதில் சாயாதே..
இதில் அமராதே..
கறையாகும் உடைந்து போகுமென
அறிவுறுத்தும் பெரிசுகளின் பேச்சுகள்
குறைந்தவர்களையும் குறைக்கும்.!
நவீனங்களும்
அதிதீவிர பாதுகாப்பும்
வீடெங்கும் நிரம்பியிருக்க
யாரும் நடமாட்டமற்றயென் வீட்டில்
துபாய்காரன் வீடு யென்கிற
அடையாளம்
மட்டும் மிச்சமிருக்கலாம் நாளை.!